Vefkökur

Með því að smella á „Leyfa allar“ samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur

Aðgengileg, örugg og mannleg bankaþjónusta

Við viljum einfalda líf viðskiptavina með aðgengilegri, öruggri en jafnframt mannlegri bankaþjónustu. Við bjóðum framúrskarandi stafrænar lausnir en hjá okkur geta viðskiptavinir líka fengið persónulega þjónustu og ráðgjöf, hvort sem er hjá öflugu þjónustuveri eða starfsfólki í útibúum um allt land.

Hjá okkur er ánægja viðskiptavina í fyrsta sæti og öll þjónusta miðast við það. Við spyrjum viðskiptavini hvernig þeim líki þjónustan og þær mælingar sýna mikla og stöðuga ánægju. Árið 2025 mældist ánægja 4,7 af 5 mögulegum og ánægja með Landsbankaappið mældist 4,8 sem er sama niðurstaða og á fyrra ári. Þá varð Landsbankinn hæstur af viðskiptabönkunum þremur í Íslensku ánægjuvoginni árið 2026. Bankinn fékk 72,3 stig, 3,3 stigum meira en árið áður og hefur ekki fengið svona góða útkomu í næstum 20 ár.

Í árslok 2025 voru um 131.200 einstaklingar í virkum viðskiptum við bankann og fjölgaði þeim um 2.800 á milli ára. Markaðshlutdeild bankans á einstaklingsmarkaði mældist 40,2% um áramót og Landsbankinn er því sem fyrr sá banki sem flestir Íslendingar velja sem sinn aðalviðskiptabanka. 

Stöðug stafræn þróun og einfaldri dagleg fjármál

Á árinu 2025 héldum við áfram að efla þjónustuna á öllum sviðum. Ýmsum nýjungum var bætt við Landsbankaappið og öryggið var enn aukið. Appið er einfalt í notkun og aldrei hefur verið auðveldara að sinna fjármálunum og hafa yfirsýn yfir fjárhaginn.

Nánar er fjallað um appið og stafræna þróun í kaflanum Stöðug framför.

Öflugt þjónustunet um allt land

Um leið og við bjóðum upp á framúrskarandi stafrænar lausnir hafa viðskiptavinir aðgang að öflugasta þjónustuneti landsins þegar kemur að fjármála- og tryggingaþjónustu. Landsbankinn rekur 34 útibú og afgreiðslur um allt land, langtum fleiri en önnur fjármálafyrirtæki. Við stærri útibúin eru hraðbankar aðgengilegir allan sólarhringinn og alls geta viðskiptavinir komist í hraðbanka á 43 stöðum, hringinn í kringum landið.  

Við veitum einnig fjölbreytta þjónustu og vandaða ráðgjöf í gegnum Þjónustuver bankans. Heildarfjöldi erinda sem starfsfólk í Þjónustuverinu leysti úr á árinu 2025 var rúmlega 342.000. Þau svöruðu um 214.000 símtölum, 86.500 tölvupóstum og ræddu 19.300 sinnum við viðskiptavini í gegnum netspjallið á landsbankinn.is. Heimsóknir í útibú voru yfir 860.00, þar af voru í kringum 90.000 heimsóknir til gjaldkera og 187.500 heimsóknir til fjármálaráðgjafa.  

214.057

símtöl

86.505

tölvupóstar

19.332

netspjöll

Heimsóknir til gjaldkera drógust lítillega saman sem endurspeglar að fleiri viðskiptavinir afgreiða sig nú sjálfir í gegnum sjálfsafgreiðslulausnir. Á hinn bóginn fjölgaði fjarfundum með fjármálaráðgjöfum um 19%. Starfsfólk í útibúum á landsbyggðinni annast stóran hluta af fjarfundunum. Miðjan er yfirheiti á fjölmörgum verkefnum sem unnin eru óháð staðsetningu en þannig geta viðskiptavinir fengið þjónustu frá starfsfólki í útibúum um allt lands. Þannig styttum við biðtíma og bætum þjónustuna enn frekar. Miðjan hefur einnig orðið til þess að styrkja starfsemina í útibúunum og aukið fjölbreytni í störfum.

Með því að bjóða framúrskarandi stafrænar lausnir og aðgang að víðtæku útibúaneti styrktum við tengsl bankans við viðskiptavini og samfélög um allt land. Með áframhaldandi þróun og bættri þjónustu munum við halda áfram að bjóða lausnir sem styðja við fjárhagslegt öryggi og einfaldleika í fjármálum.

Útibúið á Akureyri á nýjan stað

Landsbankinn og TM á Akureyri flutti í nýtt og nútímalegt húsnæði við Hofsbót 2-4 í miðbæ Akureyrar í febrúar 2025.

Í apríl lokaði afgreiðsla bankans á Seyðisfirði en áfram verða sjálfsafgreiðslutæki þar aðgengileg allan sólarhringinn

Í ágúst var samið um að Landsbankinn á Selfossi myndi flytja í nýtt húsnæði við Austurveg 11 fyrir árslok 2027.

Fjölbreyttari valkostir í sparnaði og aukið fjárhagslegt svigrúm

Innlán heimila héldu áfram að aukast. Þrátt fyrir aukna kortaveltu og vaxandi neyslu jókst yfirdráttur heimila ekki á árinu sem endurspeglar sterka stöðu heimilanna.

Sem fyrr er vinsælast að spara í appinu en þar bjóðast bestu kjör sem völ er á á óbundnum reikningum. Um áramótin áttu 78.100 viðskiptavinir sparnaðarreikning í appinu og hafði fjölgað um 23% frá fyrra ári.

Á árinu bættist við ný sparnaðarleið þar sem hægt er að tengja kreditkort við sparnaðarreikning í appinu og spara sjálfkrafa með hverri færslu. Hægt er að velja að spara ákveðna upphæð með hverri færslu eða námunda upp að eigin vali.

TM og Landsbankinn – sterkur grunnur til að byggja á

Á árinu 2025 var hafin samþætting tryggingaþjónustu inn í þjónustu Landsbankans við einstaklinga í kjölfar kaupa bankans á TM, sem tóku gildi 28. febrúar. Unnið var að því að einfalda þjónustu og bæta aðgengi viðskiptavina að tryggingum samhliða bankaviðskiptum. Höfuðstöðvar TM fluttust í miðbæ Reykjavíkur og útibú TM og Landsbankans voru sameinuð á Akureyri, í Reykjanesbæ og í Vestmannaeyjum.

Tryggingaráðgjöf er í boði í útibúum bankans og viðskiptavinir geta hafið tryggingaferli í Landsbankaappinu. Þar er boðið upp á val á milli tryggingaráðgjafar TM eða trygginga sem hægt er að kaupa beint. Ferlið heldur síðan áfram í appi TM.

Áhersla var lögð á þjálfun starfsfólks Landsbankans í tryggingaráðgjöf, sem styrkir heildstæða ráðgjöf til einstaklinga og eykur möguleika á samþættri sölu og þjónustu. Samþætting þjónustunnar heldur áfram og á árinu 2026 verður afraksturinn enn sýnilegri.

TM og Aukakrónur

Í janúar 2026 var tilkynnt að allir sem eru með tryggingar hjá TM fá 1% endurgreiðslu í formi Aukakróna þegar greitt er með korti tengdu við Aukakrónukerfið. Einnig er hægt að borga fyrir tryggingarnar með Aukakrónum. 

Fumlaus viðbrögð við dómum í vaxtamálum

Í kjölfar dóms Hæstaréttar 14. október 2025 í vaxtamáli gegn Íslandsbanka, sem sneri að skilmála í óverðtryggðu íbúðaláni, fór fram umfangsmikil endurskoðun á framboði nýrra íbúðalána hjá Landsbankanum.

Vegna þeirrar óvissu sem kom upp eftir dóminn voru umsóknir um íbúðalán settar tímabundið á bið í nokkra daga. Við lögðum engu að síður áherslu á að klára afgreiðslu á lánsloforðum sem þegar höfðu verið veitt þannig að óvissan myndi ekki hleypa fasteignaviðskiptum í uppnám. Landsbankinn varð síðan fyrstur allra lánveitenda til að kynna nýtt vöruframboð íbúðalána 24. október eða 10 dögum eftir að dómur féll. Skömmu fyrir jól féllu dómar í Hæstarétti í tveimur vaxtamálum sem vörðuðu Landsbankann. Þótt skilmálarnir hafi verið dæmdir ólögmætir, var bankinn sýknaður af fjárkröfum í málinu, sem við teljum að staðfesti að vaxtaákvarðanir Landsbankans hafi verið málefnalegar og sanngjarnar gagnvart viðskiptavinum okkar.

Vildum bjóða nýjar leiðir til að draga úr óvissu

„Þegar dómur féll í fyrsta vaxtamálinu lögðum við mikla áherslu að bregðast hratt og örugglega við til að draga úr óvissu og truflun á húsnæðimarkaði. Við vorum því ánægð með að geta kynnt breytingar á framboði nýrra íbúðalána aðeins 10 dögum eftir að dómurinn féll.

Dómurinn gerði það að verkum að óverðtryggð íbúðalán á breytilegum vöxtum urðu að hafa fast viðmið. Við fórum þá leið að láta ný óverðtryggð íbúðalán bankans bera fast vaxtaálag sem leggst ofan á stýrivexti Seðlabankans. Breytingar á stýrivöxtum leiða því sjálfkrafa til breytinga á vöxtunum.

Málið vandaðist þegar kom að verðtryggðu lánunum, enda er eðli málsins samkvæmt ekki hægt að láta þau breytast í takti við stýrivexti Seðlabankans. Þar sem slíkt viðmið skorti höfðum við fáa kosti aðra en að bjóða eingöngu verðtryggð lán á föstum vöxtum og með löngum lánstíma, nánar til tekið til 20 ára. Við buðum verðtryggð lán eingöngu fyrir fyrstu kaupendur og var þessi takmörkun sett á vegna þeirrar áhættu sem bankinn tekur með því að veita lán á föstum vöxtum til langs tíma. Með þessu vildum við koma til móts við fyrstu kaupendur sem er sá hópur sem almennt þarf sem lægsta greiðslubyrði. Við hækkuðum hámarkslánshlutfall verðtryggðra lána upp í 85% og lögðum af skiptingu í grunnlán og viðbótarlán, í þeim tilgangi að draga úr hækkun á greiðslubyrði.

Um leið buðum við nýjan kost sem er að festa vexti á óverðtryggðum lánum í 1 ár og eru lánin án uppgreiðslugjalds og því ódýrt að endurfjármagna. Töluverður áhugi hefur verið á þessum lánum en Landsbankinn er eini lánveitandinn sem býður þennan kost.

Eftir því sem fleiri dómar í vaxtamálum höfðu fallið í Hæstarétti dró úr óvissunni sem varð til þess að við gátum aftur veitt fólki heimild til að flytja verðtryggð lán á milli eigna. Við finnum að enn eru margir viðskiptavinir sem kjósa að taka verðtryggð íbúðalán, oftast vegna þess að greiðslubyrði er lág. Við erum að fara yfir þá möguleika sem við höfum, í ljósi dómanna og fleiri atriða, og meta hvort við getum aukið framboð okkar á verðtryggðum lánum og gerum ráð fyrir að þeirri vinnu ljúki fljótlega. “

Fleiri samstarfsaðilar og aukin notkun á Aukakrónum

Aukakrónur festu sig enn frekar í sessi sem eitt öflugasta fríðindakerfi landsins á árinu. Vinsældir kerfisins héldu áfram að aukast, fjölmargir öflugir samstarfsaðilar bættust í hópinn og bæði söfnun og notkun voru áfram mikil. Samtals söfnuðu viðskiptavinir 713 milljónum og nýttu 671 milljón Aukakróna við kaup á vörum og þjónustu hjá samstarfsaðilum kerfisins. Alls voru framkvæmdar 60.579 færslur með Aukakrónum og meðalupphæð á hvern notanda nam um 10.400 krónum, sem undirstrikar vaxandi styrk og notagildi kerfisins.

Söfnun

731

m. Aukakrónur

Notkun

671

m. Aukakrónur

Samstarfsaðilar

200+

fyrirtæki

Á árinu var lögð áhersla á að þróa kerfið áfram með markvissum aðgerðum sem miðuðu að því að auka virkni og sýnileika. Aukakrónudagurinn, sem haldinn var í fyrsta sinn 27. febrúar, fékk afar góðar viðtökur. Þá buðu yfir 40 samstarfsaðilar 20% endurgreiðslu í sólarhring og fjölgun viðskipta sýndi skýrt áhuga viðskiptavina á kerfinu. Stefnt er að því að endurtaka Aukakrónudaginn árið 2026.

Aukakrónuhlaupið var haldið í fyrsta sinn á árinu í samstarfi við íþróttafélagið Ármann og tóku 500 manns þátt. Með verkefninu var leitast við að styrkja vitund um Aukakrónukerfið og tengja það við virkan lífsstíl og samfélagslega þátttöku.

Yfir sumarmánuðina var hrint í framkvæmd sértækri herferð þar sem viðskiptavinir 24 ára og yngri fengu tvöfaldar Aukakrónur. Markmið herferðarinnar var að kynna kerfið betur fyrir yngri markhópum og stuðla að aukinni notkun. Samhliða voru sértilboð fyrir Aukakrónukorthafa endurvakin á heimasíðu bankans, sem styrkti ávinning ungra viðskiptavina af kerfinu.

Fleiri með í Aukakrónum

Á árinu bættust 33 ný fyrirtæki við í Aukakrónusamstarf. Úrvalið er því orðið enn fjölbreyttara og nýtist viðskiptavinum betur. Meðal nýrra samstarfsaðila voru Jómfrúin, Tokyo Sushi, Húrra Reykjavík, Flatey, GG Sport, Fjallakofinn og Sky Lagoon.

Aukakrónukerfið er einföld, stafræn og gagnsæ umbunarleið sem hefur á árinu enn frekar sýnt fram á notagildi sitt, eflt virkni viðskiptavina og styrkt tengsl þeirra við bankann.

Í um 75% tilvika tókst að stöðva svik eða endurheimta fé

Landsbankinn leggur mikla áherslu á varnir og fræðslu um netsvik. Í nóvember árið 2024 opnaði bankinn sérstaka svikavakt sem er opin frá kl. 9-23 alla daga en utan þess tíma færast símtöl sjálfkrafa yfir á neyðarnúmer vegna greiðslukorta. Árið 2025 var fyrsta heila starfsárið hjá svikavaktinni. Um tugur starfsfólks skiptir með sér svikavaktinni, bæði á afgreiðslutíma og utan hans. Árið 2025 fékk svikavaktin alls 2.221 símtal og 6.567 tölvupósta. Að meðaltali var hringt rúmlega sex sinnum á dag í svikavaktina utan afgreiðslutíma bankans.

Árið 2025 skráðum við í bankanum alls 1.465 svikamál sem beindust gegn viðskiptavinum. Þar af leiddu 374 mál til raunverulegs fjártjóns, eða í um 25% tilvika, en í öðrum tilvikum varð ekki fjártjón eða það tókst að stöðva svikafærslur eða endurheimta peningana. Sem fyrr var það einkum eldra fólk sem varð fyrir tjóni í netsvikum. Hátt í 60% alls fjártjóns á árinu 2025 varð hjá viðskiptavinum sem voru 65 ára eða eldri.

Landsbankinn stóð fyrir fjölda fræðslufunda um netsvik og tók virkan þátt í umræðunni og forvörnum. Nánar er fjallað um fræðslustarf bankans í kaflanum Samfélagið.

Messenger-svik eru algengust en fjárfestingasvik valda mestu tjóni

„Við í Landsbankanum leggjum mikla áherslu á varnir og fræðslu um netsvik. Í nóvember árið 2024 opnaði bankinn sérstaka svikavakt sem er opin frá kl. 9-23 alla daga en utan þess tíma er hægt að hringja í neyðarnúmer. Árið 2025 var fyrsta heila starfsárið hjá svikavaktinni. Um tugur starfsfólks skiptir með sér svikavaktinni, bæði á afgreiðslutíma og utan hans. Svikavaktin hefur sannað gildi sitt og við finnum að fólk er mjög fegið að geta rætt við einhvern hjá bankanum ef þau grunar að þau hafi orðið fyrir svikum.

Í upphafi ársins 2025 var mjög mikið um svikamál, ekki síst sem tengdust SMS-skilaboðum sem voru send í nafni Skattsins, Póstsins og fleiri fyrirtækja. Algengustu svikin voru þó hin svokölluðu Messenger-svik. Þau eru framin með þeim hætti að svikarar komast yfir Messenger-aðgang og senda síðan skilaboð til vina og tengiliða viðkomandi og biðja um símanúmerin hjá þeim. Síðan fá þeir sendan SMS-kóða sem svikarinn segir að sé vegna gjafaleiks en er í raun og veru innskráningarkóði vegna rafrænna skilríkja í bankaapp. Alvarlegustu svikin eru þó fjárfestingarsvik, þar sem fórnarlömb eru blekkt til að fjárfesta í rafmyntum, hlutabréfum eða öðru en þessar fjárfestingar eru eintóm svikamylla. Það er í þessari tegund svika sem mesta fjártjónið verður. Ástæðan fyrir því er sú að oft er um að ræða mál þar sem svikin hafa staðið yfir marga vikur eða jafnvel mánuði. Sá sem verður fyrir svikunum hefur þá gjarnan verið blekktur til að framkvæma greiðslur í sínum netbanka og áttar sig ekki fyrr en seint og um síðir að um svik hafi verið að ræða. Þá er oftast of seint að bregðast við og ómögulegt að endurheimta fjármunina. Í svona svikum tapast oft háar fjárhæðir sem fólki munar virkilega um.

Í þessum málaflokki skiptir fræðsla miklu máli. Við höfum líka hvatt viðskiptavini okkar til að ræða um netöryggi við foreldra og aldraða ættingja því svikin beinast ekki síst gegn eldri aldurshópum sem oft eru ekki eins örugg á netsvellinu og eiga auk þess oft töluvert sparifé inni á bók. Það er mjög sárt að verða fyrir netsvikum og fólk þarf sífellt að vera á varðbergi. Ef þú hefur orðið fyrir svikum er mikilvægt að hafa sem fyrst samband við bankann.“

Fastvaxtatímabili lauk hjá 4.200 viðskiptavinum

Þegar vextir voru sögulega hvað lægstir á árunum 2020-2021 nýttu margir lántakar sér tækifærið og festu vexti. Hægt var að festa vextina í 3 eða 5 ár. Á árinu 2025 lauk fastvaxtatímabilum hjá um 4.200 viðskiptavinum sem höfðu fest vextina á þessu tímabili og voru þeir alls með um 4.500 lán. Til samanburðar er gert ráð fyrir að um 1.600 íbúðalán losni af föstum vöxtum allt árið 2026.

Endalok fastvaxtatímabilsins gat leitt til töluverðrar hækkunar á greiðslubyrði. Við höfðum því samband við alla lántaka áður en lánin þeirra losnuðu af föstum vöxtum og fórum yfir áhrifin og þá möguleika sem væru í boði. Viðskiptavinum sem sáu fram á að lenda í greiðsluerfiðleikum var kynnt að þeim stæði til boða að óska eftir vaxtagreiðsluþaki en þá frestast hluti af vaxtagreiðslum sem færast þess í stað á höfuðstól lánsins.

Sparnaðarreikningur í pólskum zloty

Í febrúar varð Landsbankinn fyrstur íslenskra banka til að bjóða sparnaðarreikning í pólskri mynt, zloty, sem hlaut mjög góð viðbrögð meðal viðskiptavina af pólskum uppruna og þeirra sem vilja geyma sparnaðinn sinn í mismunandi gjaldmiðlum. Margir viðskiptavinir bankans eru pólskumælandi og við leggjum mikla áherslu á að veita þeim góða þjónustu. Hjá bankanum starfa nokkrir pólskumælandi þjónustufulltrúar, bæði appið og netbankinn hafa lengi verið í boði á pólsku og þá er hægt að nálgast ýmsar upplýsingar á pólsku á vef bankans, á sérstöku léni, landsbankinn.pl. Um síðustu áramót voru í kringum 24.000 notendur netbankans með hann stilltan á pólsku.

Afgreiddum umfangsmikil endurkröfumál fljótt og vel

Notkun greiðslukorta er mikilvægur hluti af daglegum fjármálum einstaklinga og leggur Landsbankinn ríka áherslu á ábyrga þjónustu, skýra ferla og traust samskipti við korthafa. Á árinu 2025 reyndi sérstaklega á þessa þætti í tengslum við fjölda endurkröfumála vegna gjaldþrots flugfélagsins Play. Alls voru skráðar um 5.600 endurkröfur, þar af um 1.700 mótmæli, sem unnin voru í samræmi við reglur kortasamsteypa og gildandi vinnulag bankans.

Til að bregðast við aðstæðum var kröfum forgangsraðað, unnið skipulega og upplýsingagjöf til korthafa efld. Þar sem mögulegt var, var ákveðið að greiða út útistandandi endurkröfur á meðan mál voru í vinnslu, með fyrirvara um möguleg mótmæli. Með þessum aðgerðum var dregið úr óvissu og tryggt að korthafar hefðu aðgang að fjármunum sínum á meðan mál voru til meðferðar.

Stuðningur við orkuskipti

Þrátt fyrir aukna sölu nýrra fólksbifreiða, sem jókst um 42% milli ára, dróst bílafjármögnun einstaklinga hjá Landsbankanum lítillega saman á árinu og nam um 14,6 milljörðum króna, samanborið við 15,6 milljarða króna árið áður. Þróunin endurspeglar áframhaldandi breytingar á markaðsaðstæðum og kauphegðun einstaklinga.

Landsbankinn leggur áfram áherslu á að styðja við orkuskipti í samgöngum með því að bjóða viðskiptavinum sínum hagstæðari kjör við kaup á umhverfisvænni bifreiðum, þar á meðal rafmagnsbílum. Hlutfall bílafjármögnunar bankans sem tengdist rafmagnsbílum nam um 16% um síðustu áramót, sem er í takt við þróun í nýskráningum bifreiða á markaði.

Gert er ráð fyrir að hlutfall fjármögnunar vegna rafmagnsbíla muni aukast á næstu árum, samhliða áframhaldandi orkuskiptum í samgöngum og auknu framboði umhverfisvænna bifreiða. Með þessu styður bankinn við sjálfbæra þróun og markmið um minni losun í samgöngum.