Alhliða þjónusta við fyrirtæki af öllum stærðum og gerðum

Markaðshlutdeild Landsbankans á fyrirtækjamarkaði er 33,0% þegar litið er til fyrirtækja sem skila ársreikningi. 

Ör vöxtur færsluhirðingar Landsbankans hélt áfram og við hófum að bjóða fyrirtækjum upp á tryggingar hjá TM. Fyrirtæki geta nú nálgast alla fjármálaþjónustu sem þau þurfa á að halda hjá okkur. 

Leiðandi í útlánum til sjávarútvegs 

Stefna Landsbankans er að vera áfram leiðandi í fjármögnun í íslenskum sjávarútvegi. Við stefnum á að auka útlán til greinarinnar samhliða auknum fjárfestingum.   

Útlán til sjávarútvegs eru um 20% af heildarútlánum bankans til fyrirtækja og er vilji til að hækka það hlutfall en þau stóðu í 190 milljörðum króna í lok árs 2025. Landsbankinn er með sterka markaðshlutdeild í sjávarútvegi og nýtir styrkleika sína, sem felast í miklum sveigjanleika og viðbragðsflýti, til að halda stöðu sinni þrátt fyrir aukna samkeppni frá erlendum fjármálastofnunum sem geta í krafti stærðar og lægri skatta boðið hagstæðari kjör. 

Árið 2025 var fremur gott ár í íslenskum sjávarútvegi og umtalsvert betra en árið 2024. Það sem skýrir bætta afkomu er að veiðar og vinnsla gengu almennt vel, heimilt var að veiða loðnu á árinu og fiskverð var í hæstu hæðum.   

Hækkun veiðigjalda kemur til með að hafa umtalsverð áhrif á sjávarútveg á næsta ári. Félögin munu leita leiða til að hagræða í rekstri og fyrirséð er að nýfjárfestingum verði slegið á frest. Auk þess er staða á sameiginlegum uppsjávarstofnum á borð við makríl og kolmunna ekki góð og búast má við samdrætti í veiðum. Hvoru tveggja mun draga úr eftirspurn eftir lánsfé, allavega tímabundið. 

Sjókvíaeldi stendur enn frammi fyrir miklum áskorunum. Félögin hafa flest hver náð tökum á framleiðslunni en afurðaverð á laxi er lágt og stærstan hluta ársins 2025 var það undir framleiðslukostnaði. Framleiðsla ársins 2025 var um 50.000 tonn sem er svipað og árið áður. Áherslur næstu missera þurfa að vera á að ná stöðugleika í framleiðslu fremur en að auka magn.  Uppbygging í landeldi heldur áfram með mjög miklum fjárfestingum. 

Vöxum með ferðaþjónustunni 

Landsbankinn er nokkuð umsvifamikill í útlánum til ferðaþjónustu. Bókfærð staða útlána er 110 milljarðar króna í árslok 2025 og helst stöðug á milli ára. Við stefnum að því að vaxa með atvinnugreininni á næstu árum en taka þarf hæg og örugg skref til vaxtar þar sem greinin er sveiflukennd eins og dæmin sanna.   

Árið 2025 varð lítils háttar samdráttur í komu erlendra ferðamanna til Íslands. Skýringanna er annars vegar að leita í háu raungengi sem veikir samkeppnisstöðu Íslands gagnvart helstu samkeppnislöndum, svo sem Noregi og Finnlandi. Hins vegar hafði fall flugfélagsins Play áhrif þar sem dró úr framboði á flugi til landsins seinni hluta ársins. Auk þess má nefna háan vaxtakostnað og hækkandi launakostnað sem þrengir enn frekar að greininni.   

Áætlað er að fjöldi ferðamanna hafi verið 2,25 milljónir árið 2025 sem er í góðu samræmi við ferðamannaspá Greiningardeildar Landsbankans. Þrátt fyrir fækkun ferðamanna gengur rekstur í ferðaþjónustu almennt vel. Sameiningar og aukin samþætting hafa leitt til lægri kostnaðar og gert félögin betur í stakk búin til að takast á við breytingar og aukna samkeppni.   

Fjárfestingar voru umtalsverðar í greininni á árinu 2025, en þar er einkum um að ræða byggingu nýrra hótela á höfuðborgarsvæðinu og Suðurlandi, auk fjárfestinga í náttúruböðum og baðlónum. Landsbankinn var sem áður traustur bakhjarl í mörgum spennandi verkefnum á árinu. 

Leiðandi afl í færsluhirðingu   

Landsbankinn hefur á stuttum tíma orðið að leiðandi afli í færsluhirðingu á Íslandi, með um 25% markaðshlutdeild í lok árs 2025. Með nýjustu tækni, framúrskarandi þjónustu og öflugu sölu- og markaðsstarfi hefur vöxtur færsluhirðingar farið fram úr björtustu vonum.  

Árið 2025 varð þreföldun á fjölda færslna sem fóru í gegnum kerfi bankans miðað við árið á undan og velta færsluhirðingar Landsbankans þrefaldaðist einnig. Um 7.227 færslur fóru í gegnum kerfi bankans á hverjum klukkutíma allan sólarhringinn, en það gerir um 120 færslur á mínútu. Þá eru posar á vegum færsluhirðingar Landsbankans orðnir 3.300 talsins um allt land.  

Gögn tengd færsluhirðingu fyrirtækja eru nú í auknum mæli sótt með vefþjónustu sem býður upp á að bóka uppgjör beint inn í bókhaldskerfi viðkomandi fyrirtækis. Frekari framþróun færsluhirðingar er í fullum gangi og við munum halda áfram að gera kortaviðskipti skilvirkari, þægilegri og betri með því að bæta núverandi lausnir og eins kynna nýjar lausnir til leiks. 

Mikið að gera í bíla- og tækjafjármögnun 

Talsverð aukning varð í sölu nýrra fólksbifreiða á árinu 2025 frá fyrra ári en hafa ber í huga að árið 2024 var sala lítil í öllu tilliti. Aukningin á milli ára nemur 42,3% og var salan á síðustu mánuðum ársins langt umfram meðaltal. Þetta má að miklu leyti rekja til breytinga á vörugjöldum bifreiða sem tóku gildi 1. janúar 2026. Breytingin hafði í för með sér talsverða hækkun á söluverði flestra bifreiða með bensín- og díselvélar, bæði hefðbundinna bíla og tengiltvinnbifreiða. Margir ákváðu að tryggja sér kaup á nýrri bifreið fyrir áramót og þá sérstaklega bílaleigur sem kaupa um 40% af öllum nýjum fólksbílum sem seldir eru á landinu. 

Þrátt fyrir þessa auknu sölu fólksbifreiða dró aðeins úr útlánum til fyrirtækja til bíla- og tækjafjármögnunar. Samdrátturinn nemur 5,4% á árinu og taldi lánasafnið 44,4 milljarða króna í lok árs 2025. 

Ráðgjöf vegna umfangsmikilla viðskipta 

Árið hjá Fyrirtækjaráðgjöf var afar fjölbreytt og annasamt. Fyrirtækjaráðgjöf annaðist ráðgjöf í mörgum stærstu viðskiptum ársins, bæði með skráð og óskráð félög. Fyrirtækjaráðgjöf var ráðgjafi fjármála- og efnahagsráðuneytisins við skipulagningu á markaðsettu útboði á eftirstandandi hlut ríkisins (45,2%) í Íslandsbanka. Fyrirtækjaráðgjöf var söluráðgjafi í hlutafjárhækkun Amaroq til erlendra og innlendra fjárfesta ásamt því að vera umsjónaraðili skráningar hlutanna til viðskipta í kauphöll. Þá veitti Fyrirtækjaráðgjöf Landsbankanum ráðgjöf vegna kaupa bankans á TM. 

Verkefnastaða Fyrirtækjaráðgjafar hefur verið mjög góð. Það stefnir í að ýmis viðskipti verði leidd til lykta á komandi misserum og má þar merkja töluverða virkni á markaði óskráðra hlutabréfa. Einnig er Fyrirtækjaráðgjöf að vinna að undirbúningi fyrir skráningu tveggja fyrirtækja í Kauphöll, Stoða fjárfestingarfélags annars vegar og Bláa Lónsins hins vegar. Ef markaðsaðstæður leyfa verður árið fram undan einnig annasamt ár í skráningum.