Helstu atriði ársreiknings

Eiginfjárhlutfall bankans í lok árs 2025 var 24,8% en var 24,3% í lok árs 2024. Bankinn er með sterka eiginfjárstöðu og er eiginfjárhlutfall 450 punktum yfir 20,3% kröfu eftirlitsaðila.

Kostnaður sem hlutfall af tekjum (K/T) á árinu 2025 var 34,3%, samanborið við 32,4% á árinu 2024.

Á árinu 2025 var vaxtamunur í hlutfalli af meðalstöðu heildareigna 2,7%, sama hlutfall og árið áður.

Hreinar vaxtatekjur námu 62,1 milljarði króna samanborið við 57,2 milljarða króna 2024.

Hreinar þjónustutekjur Landsbankans námu 12,6 milljörðum króna árið 2025 samanborið við 11,4 milljarða króna á árinu 2024. Afkoma af vátryggingarsamningum nam 1,7 milljörðum króna á árinu 2025. Aðrar rekstrartekjur voru 7,8 milljarðar króna samanborið við 11,1 milljarð króna á árinu 2024.

Rekstrarreikningur

Hagnaður Landsbankans á árinu 2025 nam 38 milljörðum króna eftir skatta.

Hreinar vaxtatekjur námu 62,1 milljarði króna á árinu 2025 samanborið við 57,2 milljarð króna árið 2024. Vaxtamunur í hlutfalli af meðalstöðu heildareigna er óbreyttur frá fyrra ári, eða 2,7%. Hreinar þjónustutekjur námu 12,6 milljörðum króna á árinu 2025 samanborið við 11,4 milljarða króna á árinu 2024. Afkoma af vátryggingarsamningum nam 1,7 milljörðum króna á árinu 2025.

Hrein virðisrýrnun fjáreigna á árinu var neikvæð um 1,2 milljarða króna á árinu. Vanskil eru enn lág.

Aðrar rekstrartekjur voru um 7,8 milljaðrar króna á árinu 2025 samanborið við 11,1 milljarð króna árið 2024 en lækkunin á milli ára skýrist einkum af lakari afkomu af hlutabréfaeign samstæðunnar.

Rekstrargjöld á árinu 2025 voru 32,0 milljarðar króna samanborið við 29,3 milljarða króna á árinu 2024. Þar af voru laun og launatengd gjöld 18,1 milljarður króna og aukast um 9,5% á milli ára, einkum vegna samningsbundinna hækkana vegna stækkunar samstæðunnar. Annar rekstrarkostnaður var 11,2 milljarðar króna á árinu 2025 í samanburði við 10,2 milljarða króna á árinu 2024.   

Kostnaður sem hlutfall af tekjum (K/T) fyrir árið reiknast 34,3%. K/T hlutfallið sýnir hlutfall rekstrarkostnaðar bankans á móti hreinum rekstrartekjum, að undanskildum virðisbreytingum fjáreigna. Stöðugildum í samstæðu bankans fjölgaði um 108 á árinu 2025, úr 822 í 930, en fjölgunin frá fyrra ári er vegna kaupa bankans á TM.

Efnahagsreikningur

Heildareignir Landsbankans námu 2.324,9 milljörðum króna í árslok 2025 og stækkaði efnahagsreikningurinn um 7%, eða 143,2 milljarða á milli ára.

Útlán til viðskiptavina jukust um 4,3%, eða um 77 milljarða króna. Útlán til fyrirtækja jukust um 75 milljarða króna og útlán til einstaklinga um 2 milljarða króna.

Sjóður og innstæður í Seðlabanka lækka um 4,5 milljarða króna á milli ára og námu í árslok 2025 alls 125,6 milljörðum króna.

Markaðsskuldabréf jukust um 54,2 milljarða króna á árinu og voru 193,3 milljarðar. Hlutabréfaeign bankans lækkar um 2,1 milljarð króna á árinu. Útlán og kröfur á lánastofnanir hækkuðu um 1,7 milljarða á árinu og voru í árslok 41,1 milljarðar. Aðrar eignir námu 50,2 milljörðum króna.

Innlán frá viðskiptavinum eru stærsti hluti fjármögnunar bankans. Heildarinnlán námu 1.249,3 milljörðum króna í lok árs 2025 og jukust um 20,9 milljarða króna, eða 1,7% á milli ára.

Innlán frá fjármálafyrirtækjum hækkuðu á árinu um 8,3 milljarða og voru í árslok 20,3 milljarðar króna.

Fjármögnun gekk vel á árinu og aukið hefur verið við fjölbreytni í lántöku. Heildarskuldabréfaútgáfa jókst um 62,5 milljarða króna á árinu 2025.

Fjármögnun hefur gengið vel. Fjölbreytni og hagkvæmni í fjármagnsskipan jókst á fyrri helmingi ársins með útgáfu AT1-skuldabréfa og víkjandi forgangsbréfa. Öll skuldabréfaútgáfa bankans í evrum er nú græn og alls er 64,2% af allri erlendri fjármögnun bankans græn.

Lánshæfismat

Í apríl 2025 tilkynnti alþjóðlega lánshæfismatsfyrirtækið S&P Global Ratings (S&P) um hækkun á lánshæfiseinkunn Landsbankans og hækkaði lánshæfismat bankans úr BBB+ í A- með stöðugar horfur. Lánshæfismatið hefur ekki verið hærra frá árinu 2014, þegar S&P hóf að veita bankanum lánshæfiseinkunn. Í rökstuðningi vísar S&P til stöðu skulda bankans með aukinni tapgleypni (e. ALAC buffer) í kjölfar útgáfu víkjandi forgangsskuldabréfa þar sem bankinn sýndi fram á traust markaðsaðgengi. Enn fremur voru lánshæfiseinkunnir fyrir skuldir sem njóta verndar í skilameðferð (e. resolution counterparty ratings, RCR) til lengri og skemmri tíma hækkaðar úr A-/A-2 í A/A-1. S&P staðfesti lánshæfismat bankans í desember 2025. Bætt lánshæfi styrkir enn frekar aðgengi bankans að innlendum og erlendum fjármálamörkuðum. 

Sé lánshæfi bankans hjá S&P greint eftir tegundum skuldagerninga eru sértryggð skuldabréf metin í flokki A+, ótryggð skuldabréf í flokki A-, víkjandi forgangsbréf í flokki BBB, víkjandi skuldabréf eiginfjárþáttar 2 í flokki BBB- og verðbréf viðbótar víkjandi eiginfjárþáttar 1 í flokki BB.

Fjármögnun

Markaðsfjármögnun bankans hefur einkum verið í formi alþjóðlegrar EMTN-skuldabréfaútgáfu og útgáfu sértryggðra skuldabréfa á innlendum og erlendum markaði. Bókfært virði þessarar fjármögnunar hækkaði um 48 milljarða króna á árinu 2025 og nam samtals 577 milljörðum króna.

Útgáfurammi bankans fyrir sértryggð skuldabréf er 3,5 milljarðar evra (jafnvirði um 515 milljarða króna í lok árs). Sértryggðar skuldabréfaútgáfur bankans námu 290 milljörðum króna í árslok 2025 og hækka um 23 milljarða króna á árinu. Í árslok 2025 nam almenn óveðtryggð lántaka bankans í erlendum gjaldmiðlum samtals 242 milljörðum króna. Skuldabréfaútgáfa bankans á erlendum mörkuðum gekk vel á árinu og endurspegla eftirspurn og útgáfukjör gott aðgengi bankans að erlendum fjármagnsmörkuðum.

Þann 11. febrúar 2025 lauk Landsbankinn við sölu verðbréfa sem telja til viðbótar eiginfjárþáttar 1 (e. Additional Tier 1 securities eða AT1), að andvirði 100 milljóna bandaríkjadala (jafnvirði um 12,5 milljarða króna). Um er að ræða fyrstu AT1 útgáfu Landsbankans og voru bréfin seld til fjárfesta á föstum 8,125% vöxtum. Verðbréfin eru víkjandi gagnvart öllum öðrum kröfum, að hlutafé undanskildu. Útgáfan var liður í fjármögnun kaupa bankans á TM, en leiðir jafnframt til aukinnar hagkvæmni og fjölbreytni í fjármagnsskipan bankans. Stefnt er að annarri sambærilegri útgáfu á fyrri hluta árs 2026.

Í árslok 2025 námu víkjandi skuldabréf eiginfjárþáttar 2 samtals um 41,6 milljörðum króna (2024: 40 milljarðar króna).

Eigið fé Landsbankans í árslok 2025 var 343,8 milljarðar króna samanborið við 324,6 milljarða króna í árslok 2024. Heildareignir námu 2.324,9 milljörðum króna í árslok 2025, og stækkaði efnahagsreikningurinn um 7%, eða um 143 milljarða króna á árinu.

Aðalfundur Landsbankans 2025, sem haldinn var 19. mars 2025, samþykkti tillögu bankaráðs um að greiða arð til hluthafa vegna reikningsársins 2024 sem næmi 0,80 krónum á hlut og að arðgreiðslan yrði tvískipt. Fyrri arðgreiðslan, 0,4 krónur á hlut, var greidd til hluthafa þann 26. mars 2025 en sú síðari, 0,4 krónur á hlut, var greidd þann 17. september 2025. Arðgreiðslurnar námu í heild 18,9 milljörðum króna og jafngilda um 50% af hagnaði ársins 2024.

Aðalfundur bankans 2025 endurnýjaði heimild bankans til kaupa á eigin hlutum sem næmu allt að 10% af nafnverði hlutafjár Landsbankans. Markmiðið með endurkaupunum er að lækka eigið fé bankans og gefa hluthöfum um leið tækifæri til að selja hluti sína með gegnsæjum hætti. Heimildin gildir fram að aðalfundi á árinu 2026.

Bankaráð hyggst leggja til við aðalfund Landsbankans 2026, sem er á dagskrá þann 18. mars nk., að greiddur verði arður til hluthafa í samræmi við arðgreiðslustefnu bankans sem nemur um 50% af hagnaði ársins 2025. Við útreikning á eiginfjárhlutföllum samstæðunnar í lok árs 2025 hefur þegar verið tekið tillit til þessarar fyrirsjáanlegu arðsúthlutunar. Einnig er bankaráð með til skoðunar að leggja til sérstaka arðgreiðslu fyrir aðalfundinn.

Í október 2025 birti skilavald Seðlabanka Íslands nýjustu ákvörðun sína vegna lágmarkskröfu um eiginfjárgrunn og hæfar skuldbindingar (MREL) fyrir Landsbankann. MREL-ákvörðun skilavaldsins felur í sér að bankinn þarf ávallt að uppfylla 30,8% MREL-kröfu, sem hlutfall af áhættugrunni bankans.

Markmið bankans er að auka hagkvæmni í fjárhagsskipan, en vera jafnframt ávallt í hæsta flokki hvað áhættuvegið eiginfjárhlutfall varðar, eins og það er ákvarðað og metið af viðeigandi lánshæfismatsfyrirtækjum. Með innleiðingu CRR III reglugerðarinnar skapast aukið rými til vaxtar og arðgreiðslna. Almennt eigið fé þáttar 1 (CET1) í lok árs 2025, sem hlutfall af áhættugrunni, var 21,2%, en markmið bankans er að vera yfir 18%.

Lausafjárstaða

Lausafjár- og fjármögnunarhlutföll eru vel umfram lögbundnar kröfur og innri áhættumörk bankans. Lausafjárstaða bankans er sterk í lok árs 2025. Hlutfall heildarlausafjárþekju var 180%, 122% í íslenskum krónum og 1386% í evrum. Lausafjáreignir námu 322,1 milljarði króna í lok árs 2025.

Meginmælikvarði lausafjáráhættu til skamms tíma er lausafjárþekjuhlutfall (e. liquidity coverage ratio (LCR)) sem mælir hlutfall hágæða lausafjáreigna af nettó heildarútflæði á næstu 30 dögum miðað við tilteknar álagsaðstæður.

Heildarlausafjárþekja var 180% í lok árs 2025 en Seðlabankinn gerir kröfu um að hlutfallið sé að lágmarki 100%. Lausafjárþekja í evrum var á sama tíma 1386% en Seðlabankinn gerir kröfu um að það hlutfall sé að lágmarki 80%. Lausafjárþekja í íslenskum krónum var 122% í lok árs 2025 en Seðlabankinn gerir kröfu um að hlutfallið sé 50%.