Landsbankinn Logo

Vefkökur

Með því að smella á „Leyfa allar“ samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur

Traustur bakhjarl fjölbreyttra verkefna 

Við stuðlum að uppbyggingu og framþróun í samfélaginu og leggjum okkur sérstaklega fram við að veita brautargengi ólíkum verkefnum og samtökum um allt land. Stefna bankans er að hafa jákvæð áhrif á samfélagið, bæði með beinum fjárstuðningi og virkri þátttöku.   

Sjóðir og styrkir 

Tilgangurinn með styrktarsjóðum bankans er til að lyfta upp verkefnum sem við teljum líkleg til að efla íslenskt samfélag til framtíðar og ýta undir fjölbreytni og nýsköpun, bæði í menningarmálum og atvinnulífinu.   

Samfélagssjóður

Samfélagsstyrkjum Landsbankans er ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, umhverfismál og náttúruvernd og verkefni á sviðum sjálfbærni, menningar og lista. Frá árinu 2011 hafa hátt á fimmta hundrað verkefna fengið styrki úr Samfélagssjóði Landsbankans og nema styrkirnir samtals 245 milljónum króna. Árið 2025 var samfélagsstyrkjum samtals að upphæð 20 milljónum króna úthlutað úr sjóðnum til alls 32 verkefna. Verkefnin eru afar fjölbreytt og gagnast fólki á öllum aldri og víða um land.  

Námsstyrkir 

Landsbankinn úthlutaði námsstyrkjum til sextán hæfileikaríkra námsmanna úr Samfélagssjóði bankans í maí. Námsstyrkirnir voru veittir í 36. sinn og heildarupphæð styrkjanna nemur átta milljónum króna. Alls bárust um 450 umsóknir í ár. Dómnefndin leitaðist við að velja metnaðarfulla, framúrskarandi námsmenn með athyglisverða framtíðarsýn sem nefndin taldi líklega til að auðga íslenskt samfélag. 

Hvatasjóður HR og Landsbankans  

Sjóðurinn var settur á laggirnar árið 2023 og árið 2025 voru í annað sinn veittir styrkir úr honum. Markmið sjóðsins er að jafna aðgengi að námi við HR með því að styrkja nemendur sem eiga sér annað móðurmál en íslensku til grunnnáms við háskólann. Við stofnun Hvatasjóðsins voru heimsmarkmið Sameinuðu þjóðanna höfð að leiðarljósi og þá sérstaklega fjórða markmiðið: „Menntun fyrir öll“. Styrkhafar þurfa ekki að greiða skólagjöld í HR fyrsta skólaárið og er styrkurinn greiddur af Landsbankanum.  

Menning og listir 

Það er gaman að sjá kraftinn sem býr í íslenskri listsköpun. Stuðningur við fjölbreytta menningarviðburði, hátíðir og tónlistarfólk sameinar jákvæð áhrif bankans á samfélagið og viðleitni til að veita listum og menningu í landinu virkan stuðning.   

Hönnunarmars 2025

HönnunarMars 

Húsfyllir var í Landsbankanum á HönnunarMars og stemningin ótrúlega skemmtileg. Dagskráin byrjaði á samtali um fjárfestingar í hönnun og um kvöldið var ungum og upprennandi fatahönnuðum gefið sviðið í lifandi tískugjörningi undir heitinu Uppsprettan – Fatahönnuðir framtíðarinnar. Landsbankinn hefur verið aðalstyrktaraðili hátíðarinnar frá 2023 HönnunarMars og tekur virkan þátt í hátíðinni. Í ár gerðum við myndbönd um sjö hönnuði sem birtast á Youtube-rás bankans. 

Hinsegin dagar 

Við styðjum réttindabaráttu hinsegin fólks en Landsbankinn hefur verið stoltur bakhjarl Hinsegin daga í Reykjavík frá upphafi. Tíu atriði hlutu styrk úr Gleðigöngupotti Hinsegin daga og Landsbankans vegna Gleðigöngunnar 2025, en potturinn styður einstaklinga og smærri hópa við undirbúning og framkvæmd atriða í Gleðigöngunni. Í tilefni Hinsegin daga birtum við einnig umfjöllun um Öldungadeildina, hóp 60+ hinsegin fólks sem minnir á að regnboginn fölnar ekki með árunum og að réttindabaráttunni er síst lokið.   

Menningarnótt 

Við höfum verið máttarstólpi Menningarnætur frá upphafi og erum bakhjarl hátíðarinnar. Með sérstökum Menningarnæturpotti, sem við stöndum að í samvinnu við Höfuðborgarstofu, er frumlegum hugmyndum veitt brautargengi. Í ár fengu 24 spennandi verkefni styrki úr Menningarnæturpotti Landsbankans og Reykjavíkurborgar. Við buðum líka gestum og gangandi upp á spennandi listaverkagöngur í Reykjarstræti 6 og stóðum ásamt nágrönnum okkar að fjölbreyttri dagskrá við Hörputorg.  

Aldrei fór ég suður 

Við erum einn af aðalbakhjörlum rokkhátíðarinnar Aldrei fór ég suður sem haldin er á Ísafirði hverja páska. Landsbankinn hefur stutt hátíðina allt frá árinu 2010. Með því viljum við leggja okkar af mörkum til að efla grasrótarstarf í íslenskri tónlist.  

Ljósanótt

Landsbankinn er einn af aðalstyrktaraðilum Ljósanætur, svokallaður ljósberi. Hátíðin hefur verið haldin í Reykjanesbæ síðan árið 2000. Þátttaka almennings í viðburðahaldi hefur aukist jafnt og þétt og er það eitt af markmiðum hátíðarinnar að hún sé vettvangur fyrir fólk til að skapa og skemmta sér og öðrum.   

Upprásin

Veturinn 2025-2026 stendur Landsbankinn, ásamt Hörpu, Tónlistarborginni Reykjavík og Rás 2, fyrir tónleikaröð sem tileinkuð er grasrót íslenskrar tónlistar, þvert á tónlistarstefnur. Tónleikaröðin bætir aðgengi grasrótar og ungs fólks í öllum tónlistargreinum að aðstöðu og áheyrn, auk þess að efla fjölbreytni. Markmiðið er einnig að tónlistaráhugafólk geti fengið að heyra fjölbreytta nýja íslenska tónlist flutta við kjöraðstæður í tónlistarhúsi þjóðarinnar.  

Listaverkavefur Landsbankans

Glæsilegur listaverkavefur Landsbankans var opnaður árið 2024 og efldur enn frekar árið 2025. Tilgangurinn með honum er að gera sem flestum kleift að njóta listaverka bankans. Vefinn gerði Sara Karen Þórisdóttir, vefritstjóri hjá Landsbankanum, sem hluta af lokaverkefni sínu í meistaranámi í hagnýtri menningarmiðlun við Háskóla Íslands. Í tilefni kvennaársins 2025 var vefurinn uppfærður með nýjum hluta sem tileinkaður er verkum eftir konur, en í safneign Landsbankans eru fjölmörg listaverk sem teljast til þjóðargersema og þar af eru mörg eftir konur.  

Dagatal Landsbankans 

Hjá mörgum hefst nýtt ár ekki fyrr en dagatal Landsbankans er komið á skrifborðið eða eldhúshylluna. Það hefur enda komið út síðan árið 1969 og fagnar því 57 ára útgáfuafmæli í ár. Það hefur tekið nokkrum breytingum og farið úr því að vera plaststandur yfir í að vera gormað og úr pappír. Síðustu ár hefur dagatalið verið sent út til viðskiptavina sem eru 67 ára og eldri en aðrir áhugasamir, jafnt einstaklingar og fyrirtæki, geta nálgast eintak í útibúum í upphafi árs. Dagatal ársins 2025 var tileinkað vatninu og ólíku hlutverki þess í lífi okkar allra. Vatnslitamyndir eftir myndlistamanninn Stefán „Mottuna“ Óla Baldursson prýddu dagatalið og voru verkin til sýnis og sölu í Reykjastræti.  

Nýsköpun og fræðsla 

Við birtum fjölda fræðslugreina um fjármál einstaklinga á Umræðunni og fjölbreytta aðra fræðslu á vefnum okkar. Við nýtum í síauknum mæli samfélagsmiðla til að koma fræðslunni til stærri hóps og deildum fræðsluefni á Facebook og Instagram, auk þess sem við birtum ýmsar upplýsingar á TikTok. 

Fjármálafræðsla 

Við leggjum okkar af mörkum til að efla fjármálafræðslu og -læsi og bjóðum upp á heimsóknir framhaldsskóla með það mið fyrir augum að efla fjármálaskilning nemenda. Fræðsluheimsóknirnar standa öllum framhaldsskólum til boða og eru skipulagðar í samstarfi við fulltrúa þeirra.  

Drift EA 

Landsbankinn og Drift EA hafa gert samstarfssamning sem miðar að því að styðja við nýsköpun og frumkvöðlastarf á Íslandi með því að styrkja umgjörð, ráðgjöf og tengslanet fyrir frumkvöðla og sprotafyrirtæki. Drift EA er kraftmikil miðstöð frumkvöðla og nýsköpunar þar sem samfélag, þekking og aðstaða skapa frjóan jarðveg fyrir hugmyndir til að þroskast og vaxa. Með samstarfinu tekur Landsbankinn virkan þátt í uppbyggingu öflugs atvinnulífs, einkum á Norðurlandi. 

Ótrúlega gaman að hafa góð áhrif 

„Landsbankinn er einn stærsti styrktaraðili landsins. Stefna bankans er að hafa jákvæð áhrif á samfélagið og við horfum til þess að styðja við frumkvöðlastarf, íþróttir, menningu og listir til viðbótar við sjálfbærni, góðgerðarmál og menntamál.  

Gulleggið 

KLAK – Icelandic Startups og Landsbankinn hafa endurnýjað samstarf sitt um frumkvöðlakeppnina Gulleggið með undirritun nýs þriggja ára samnings þar sem verðlaunafé var tvöfaldað. Með samningnum treystir Landsbankinn hlutverk sitt sem aðalbakhjarl keppninnar enn frekar og undirstrikar langvarandi stuðning sinn við íslenska nýsköpun. Landsbankinn hefur stutt Gulleggið samfellt frá stofnun keppninnar árið 2008 og hefur átt ríkan þátt í að skapa öflugan stökkpall fyrir frumkvöðla á hugmyndastigi. Í gegnum árin hafa fjölmörg farsæl sprotafyrirtæki stigið sín fyrstu skref í Gullegginu, þar á meðal Controlant, Meniga, PayAnalytics, Taktikal og Heima app.  

Forritarar framtíðarinnar 

Sjóðurinn Forritarar framtíðarinnar er samfélagsverkefni sem hefur það hlutverk að efla og auka áhuga á forritun og hagnýtingu á tækni í skólum landsins. Sjóðurinn styrkir skóla til að senda kennara sína á námskeið í forritunar- og tæknikennslu, styður kaup á minni tækjum til slíkrar kennslu ásamt því að gefa notaðan tölvubúnað. Landsbankinn er einn af bakhjörlum sjóðsins.   

Fræðslufundir

Bankinn hefur staðið fyrir fræðslufundum um ýmis málefni víðs vegar um land. Hátt í 200 manns sóttu vel heppnaðan fund í Reykjastræti um hvernig hægt er finna milljón með því að draga úr útgjöldum eða auka tekjur. Bankinn hélt morgunfund um fjármögnun og uppbygginu innviða í samstarfi við Samtök iðnaðarins, morgunfund um innleiðingu og áhrif CRR III reglugerðarinnar og fundaröð um netöryggi og lífeyrismál var áfram vel sótt. Fundirnir voru haldnir víðs vegar um landið, m.a í Vestmannaeyjum og á Akranesi.

Íþróttir og æskulýðsstarf 

Við leggjum okkur fram við að styðja íþróttalíf og æskulýðsstarf um allt land. Útibú bankans gera það með beinum samstarfssamningum, auk þess sem við tökum þátt í ýmis konar samstarfi á landsvísu. Í slíku samstarfi leggjum við áherslu á stuðning við barna- og unglingastarf. 

Skólahreysti 

Við erum aðalbakhjarl Skólahreysti og leggjum keppninni lið með ráðum og dáð. Markmið Skólahreysti er að hvetja börn til þátttöku í alhliða íþróttaupplifun sem byggð er á grunnforsendum almennrar íþróttakennslu og þar sem keppendur vinna að mestu leyti með eigin líkama í þrautum. Keppnin var haldin í 21. sinn árið 2025 og í ár voru sett þrjú Íslandsmet í hreystigreip og eitt í upphífingum. Úrslitin réðust í æsispennandi lokakeppni tólf grunnskóla fyrir troðfullum sal í íþróttamiðstöðinni að Varmá í Mosfellsbæ. Að lokum stóð Holtaskóli uppi sem sigurvegari. 

Aukakrónuhlaup Ármanns 

Aukakrónuhlaup Ármanns var ræst í fyrsta sinn fyrir utan Landsbankann í Reykjastræti þann 2. júlí. Veðrið var með besta móti og tóku tæplega 500 hlauparar þátt, enda njóta götuhlaupin mikilla vinsælda hér á landi.  

Friðriksmótið í skák 

Friðriksmót Landsbankans – Íslandsmótið í hraðskák, var haldið í bankanum við Reykjastræti 6 í desember. Landsbankinn og Skáksamband Íslands hafa staðið fyrir Friðriksmótinu sem haldið er til heiðurs Friðriki Ólafssyni, fyrsta stórmeistara Íslands, í rúma tvo áratugi. Flestir sterkustu skákmenn þjóðarinnar tóku þátt í ár en alls voru keppendur rúmlega 80 talsins.  

Knattspyrnusamband Íslands 

Við erum bakhjarl Knattspyrnusambands Íslands. Landsbankinn styrkir uppbyggingarstarf íslenskrar knattspyrnu um land allt, öll yngri landslið og A-landslið karla og kvenna. Árið 2025 gerðum við EM kvenna einnig sérstaklega skil með glæsilegri markaðsherferð.  

Undanfarin ár höfum við veitt háttvísiverðlaun Landsbankans og KSÍ á mótum yngri flokka um allt land. Með veitingu verðlaunanna viljum við hvetja til háttvísi og heiðarlegrar framkomu hjá leikmönnum og annarra er að mótunum koma.   

Betri saman

Öflugt samstarf Landsbankans við atvinnulífið miðar að því að stuðla að aukinni verðmætasköpun, heilbrigðri samkeppni og bættum lífskjörum.   

Lánatryggingasjóðurinn Svanni   

Við erum bakhjarl Svanna - lánatryggingasjóðs kvenna. Svanni veitir lán með lánatryggingum til fyrirtækja í meirihlutaeigu kvenna og er ætlað að efla atvinnulíf og hvetja til nýsköpunar. Svanni hefur verið í samstarfi við Landsbankann um lánafyrirgreiðslu um árabil.   

Hamborgartréð og fiskisúpan 

Ljósin voru tendruð á 60 ára afmæli Hamborgartrésins þann 29. nóvember við hátíðlega athöfn á Miðbakka við Reykjavíkurhöfn þar sem Lúðrasveit Hafnarfjarðar lék jólalög við tréð. Að tendrun lokinni var gestum boðið að þiggja fiskisúpu í boði Brims í Landsbankanum við Reykjastræti. Jólasveinar og harmonikkuleikari skemmtu gestum og léku jólalög. Viðburðurinn var í boði Landsbankans, Faxaflóahafna, Brims, Hörpu, Hafnartorgs, Sjómannadagsráðsins og Þýsk-íslenska viðskiptaráðsins. 

Félagsstofnun stúdenta og Stúdentaráð HÍ   

Farsælt samstarf hefur verið á milli okkar og Félagsstofnunar stúdenta (FS) annars vegar og Stúdentaráðs Háskóla Íslands (SHÍ) hins vegar. Saman höfum við staðið fyrir ýmsum verkefnum og viðburðum, m.a. fræðsluviðburðinum Fyrirtækið ég! sem haldinn var á Háskólatorgi.   

UN Women 

Landsbankinn var styrktaraðili UN Women á kvennaárinu 2025. Við styrktum sérstaklega March Forward herferðina sem dró athygli að bakslaginu sem orðið hefur í jafnréttismálum undanfarin ár og miðaði að því að skapa samtal og samstöðu um jafnrétti. 

Háskólasjóður Eimskipafélagsins   

Háskólasjóður h/f Eimskipafélags Íslands var stofnaður árið 1964 til minningar um þá Vestur-Íslendinga sem hlut áttu að stofnun Hf. Eimskipafélags Íslands og hefur markmið hans frá upphafi verið að styðja efnilega stúdenta við Háskóla Íslands. Frá árinu 2005 hefur sjóðurinn verið í umsjá Landsbankans en sama ár var samþykkt að verja ákveðnum hluta af eign hans til að styðja nemendur í rannsóknum við HÍ, einkum doktorsnema. Yfir 200  doktorsnemar á öllum fræðasviðum skólans hafa síðan notið stuðnings sjóðsins en hann er langstærstur styrktarsjóða Háskólans með eignir upp á fjóra milljarða króna. Frá því að farið var að greiða styrki úr sjóðnum með reglubundnum hætti árið 2006 nemur heildarúthlutun styrkja rúmum 1,9 milljörðum, en þar af voru greiddar 500 milljónir til byggingar Háskólatorgs á árunum 2006 og 2007.  

Klasasamstarf í ferðaþjónustu   

Við höfum verið aðili að klasasamstarfi í ferðaþjónustu frá upphafi samstarfsins árið 2012. Að klasasamstarfinu standa lykilfyrirtæki á sviði ferðaþjónustu, opinberir aðilar og fyrirtæki sem styðja við eða eiga samstarf við greinina. Helsta markmið þess er að auka samkeppnishæfni og verðmætasköpun innan ferðaþjónustunnar.   

Íslenski sjávarklasinn  

Á árinu hóf bankinn samstarf við Íslenska sjávarklasann. Samstarfið miðar að því að styðja við aukna verðmætasköpun í bláa hagkerfinu. Áhersla verður lögð á stuðning við nýsköpunarfyrirtæki sem vinna að lausnum á þeim áskorunum sem rótgrónari fyrirtæki standa frammi fyrir, auk þess að styðja við frumkvöðla. Landsbankinn kemur að verkefninu sem styrktaraðili, auk þess sem sjávarútvegsteymi bankans mun styðja við frumkvöðla með handleiðslu og ráðgjöf.   

Örnin – framúrskarandi fyrirtæki 

Líkt og undanfarin ár veitti Landsbankinn styrki til góðs málefnis í nafni allra þeirra fyrirtækja sem hlutu viðurkenningu Creditinfo sem Framúrskarandi fyrirtæki. Að þessu sinni rann styrkurinn, fjórar milljónir, til Arnarsins. Minningar- og styrktarsjóðurinn Örninn býður upp á helgardvöl og samveru fyrir börn og unglinga sem misst hafa náinn ástvin. Öll sem koma að verkefninu gefa vinnu sína en í hópi sjálfboðaliða eru prestar, djáknar, guðfræðingar, nemar í félagsráðgjöf, sálfræðingar, matráðar, hárgreiðslufólk, tannlæknar, sjúkraþjálfarar og listamenn. 

Almannarómur 

Landsbankinn tekur þátt í og er kyndilberi verkefnis Almannaróms, Þín íslenska er málið. Markmið verkefnisins er að safna heimildum um íslenskunotkun fyrirtækja úr ýmsum greinum atvinnulífsins. Við viljum leggja okkar af mörkum til að efla íslenskuna og búa henni sterka framtíð í stafrænum heimi. Gögnin sem við leggjum til í risamálheild Almannaróms, miðlæga grunnstoð máltækni á íslensku, eru mikilvæg heimild um notkun fjármálahugtaka í fortíð og endurspegla einnig þróun íslenskunnar við örar breytingar í fjártækni, á sviði stafrænnar fjármálaþjónustu almennt og við notkun nýrra lausna á borð við gervigreind.  

Starf og útgáfa Greiningardeildar

Greiningardeild vann fjöldann allan af greiningum á árinu 2025 og gaf þær út bæði innan bankans og á ytri vef. Sérfræðingar deildarinnar voru áberandi í fjölmiðlum, ekki síst í viðtölum um hagspá, verðbólgu, vexti og fasteignamarkaðinn.    

Öflug efnahagsgreining og útgáfa

Hagsjá er vefrit með stuttum pistlum sem gefnir eru út eftir atvikum, oftast 1-3 sinnum í viku. Hagsjáin er birt á vefnum, send á fjölmennan póstlista og er iðulega til umfjöllunar í fjölmiðlum. Í pistlunum er fjallað um stöðu efnahagsmála, ríkisfjármála, fasteignamarkaðinn, verðbólguhorfur, ferðaþjónustuna og fleira, rýnt í nýjustu hagtölur hverju sinni og gefnar út spár. Í Vikubyrjun, vefplaggi sem Hagfræðideildin Greiningardeildin gefur út hvern mánudag, er gerð grein fyrir stöðunni á mörkuðum og vikan sem leið gerð upp, auk þess sem farið er yfir það sem fram undan er á sviði efnahagsmála, birtingu á hagtölum, uppgjörum fyrirtækja og fleira. Mánaðarlegt fréttabréf Greiningardeildar er ítarlegt yfirlit yfir stöðuna og horfurnar í efnahagsmálum og kemur út bæði á íslensku og ensku. Á árinu hafa hagfræðingar bankans einnig skrifað fræðslugreinar á vef bankans og umræðugreinar í dagblöð.   

Hagspá og hagfundir   

Stærsti viðburður Greiningardeildar á árinu var útgáfa og kynning á hagspá fyrir árin 2025-2028. Haldinn var hádegisfundur í Hörpu um stöðuna í alþjóðlegum efnahagsmálum og áhrifin á Ísland. Að lokinni stuttri kynningu á hagspánni flutti Giada Giani, hagfræðingur í greiningardeild Citi-bankans og sérfræðingur í evrusvæðinu, nærliggjandi löndum og hagkerfum Norðurlandanna, erindi um stöðu og horfur á mörkuðum. Viðburðinum lauk með pallborðsumræðum þar sem forstjórar þriggja útflutningsfyrirtækja ræddu um tækifæri og áskoranir í rekstri sínum.  

Virk í samfélagsumræðunni

Við héldum áfram að vera sýnileg og virk í samfélagsumræðunni. Við leggjum okkar af mörkum til að efla umræðu um efnahagsmál, fjármál og annað sem er ofarlega á baugi í samfélaginu. 

Varnir gegn netsvikum

Við höfum sinnt fræðslu um netöryggi af krafti um árabil. Á árinu skrifuðum við fræðslugreinar fyrir eigin miðla auk þess sem sérfræðingar bankans mættu í viðtöl og voru áberandi í umræðunni. Við stóðum fyrir fjölda fræðslufunda um netöryggi, bæði í Reykjavík og nágrenni og víðs vegar um landið. Sérfræðingur bankans flutti einnig erindi á ráðstefnu á vegum Öldrunarráðs Íslands og heimsótti félagsheimili og þjónustuíbúðir aldraðra. Við efldum svikavakt bankans sem er opin alla daga vikunnar frá kl. 9.00-23.00. Þar aðstoðar starfsfólk bankans viðskiptavini að bregðast við svikatilraunum af ýmsu tagi. Í ár var nýmæli að gefinn var út þraut í leikjaformi þar sem fólk fékk að spreyta sig á að greina svikatilraunir frá raunverulegum samskiptum. Gafst sú tilraun mjög vel og á einum mánuði reyndu yfir 25.500 sig við þrautina.  

Aðgengi að bankaþjónustu

Landsbankaappið er alfarið á þremur tungumálum: íslensku, ensku og pólsku. Við höldum áfram að bjóða ýmislegt annað efni á ensku og pólsku, m.a. í þeim tilgangi að stuðla að jöfnu aðgengi að fjármálaþjónustu og -fræðslu. Sérstök áhersla hefur verið lögð á að birta áríðandi skilaboð, svo sem um netsvik, á öllum þremur tungumálum samhliða. Með því að bjóða upp á aðgengilegt efni á fleiri tungumálum stuðlum við að inngildingu, aukum fjölbreytileika og eflum skilning.