Vefkökur

Með því að smella á „Leyfa allar“ samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur

Auðveldari fjármál og snjallari lausnir

Við héldum áfram að auka gæði og öryggi stafrænnar þjónustu bankans við einstaklinga og fyrirtæki á árinu. Splunkunýr netbanki fyrirtækja leit dagsins ljós og ýmsum nýjungum var bætt við Landsbankaappið sem gagnast jafnt einstaklingum, fjölskyldum og fyrirtækjum.

Landsbankaappið er fyrir löngu orðið sú leið sem einstaklingar nota helst til að nýta sér þjónustu bankans. Um áramótin notuðu 88% einstaklinga sem eru í viðskiptum við bankann appið reglulega, um 70% notuðu eingöngu appið en um 12% notuðu netbankann eingöngu. Notkun á appinu hefur aukist hröðum skrefum á undanförnum árum, enda er það einfalt og öruggt í notkun og þar er hægt að framkvæma nánast öll bankaviðskipti.

Flest fyrirtæki notast eingöngu við netbankann en notkun þeirra á appinu heldur þó áfram að aukast og þeim fyrirtækjum sem nota bæði appið og netbankann heldur áfram að fjölga.

Framþróun á appinu og annarri stafrænni þjónustu hefur gert það að verkum að viðskiptavinir eiga sífellt auðveldara með að nýta sér bankaþjónustu.

Mikil tímamót urðu í desember þegar við settum í loftið nýja útgáfu af appinu sem gerði viðskiptavinum kleift að sjá upplýsingar um tryggingar hjá TM í Landsbankaappinu. Í appinu er hægt að skoða yfirlit yfir eigin tryggingar, bæta við nýjum tryggingum og panta tíma í tryggingaráðgjöf.

Í appinu er líka m.a. hægt að skoða:

Tryggingar sem viðskiptavinur er með hjá TM.

Iðgjöld og gildistíma.

Hvort viðskiptavinur sé tjónlaus og uppfylli skilyrði fyrir árlega endurgreiðslu.

Nánari upplýsingar, s.s. vátryggingarfjárhæð, vátryggingarskírteini og skilmála.

Þetta var fyrsta skrefið af mörgum þegar kemur að tryggingum í appinu og við munum kynna enn fleiri nýjungar á árinu 2026.

Fleiri útgáfur og aukin skilvirkni

„Stærsta einstaka verkefnið á sviði upplýsingatækni á árinu 2025 var þegar umsýsla með kerfum og hugbúnaðarþróun TM færðist yfir til Landsbankans. Verkefnið var umfangsmikið og flókið í eðli sínu en gekk mjög vel og mun skila meiri samlegð, samnýtingu, sveigjanleika og rekstraröryggi.

Við hættum notkun á nokkrum eldri kerfum og héldum áfram að innleiða nýja tækni með markvissum hætti, m.a. gámatækni, en hún eykur sveigjanleika, sjálfvirkni og skilvirkni í störfum upplýsingatæknisviðs.

Árið einkenndist einnig af umfangsmiklum uppfærslum og breytingum á kerfum og gagnagrunnum og ýmsir kjarnainnviðir bankans voru endurnýjaðir.

Það er til marks um góðan árangur að útgáfum á appinu, netbankanum og fleiri tæknilausnum hélt áfram að fjölga. Árið 2025 voru útgáfurnar 15% fleiri en árið 2024 og um 90% fleiri en árið 2021. Skráðum atvikum, en þá er um að ræða einhvers konar truflun í rekstri tæknilausna, heldur áfram að fækka og voru þau um 50% færri árið 2025 en árið 2021.

Við erum byrjuð að hagnýta gervigreind með ýmsum hætti í starfsemi bankans, bæði í þjónustu til viðskiptavina en einnig í innri starfsemi og munum gera það enn frekar á næstu misserum og árum. Áhersla á rekstrarþol og öryggi verður áfram í fyrirrúmi sem og áhersla á hvers kyns öryggismál og svikavarnir.“

Greiðslukort í sjálfsafgreiðslu og aukið öryggi

Meðal annarra nýjunga í appinu og netbankanum á árinu 2025 var að við bættum við möguleikanum á sjálfsafgreiðslu greiðslukorta. Þetta einfaldar líf viðskiptavina sem þurfa ekki lengur aðstoð starfsfólks við ýmsa umsýslu með kortunum heldur geta nú sinnt henni sjálf, þegar þeim hentar.

Í appinu er m.a. hægt að panta debet- og kreditkort, loka kortum, tilkynna kort týnd eða stolin, panta ný kort í stað eldri, skipta um kortategund, velja afhendingarstað og stjórna notkunarmöguleikum á kortunum, bæði hefðbundnum plastkortum og þeim sem eingöngu eru aðgengileg í kortaveskjum í síma eða í netnotkun. Jafnframt birtast nú ítarlegri upplýsingar um greiðslukortin, m.a. um fríðindi, tryggingar og árgjöld, sem veitir viðskiptavinum betri yfirsýn. Viðskiptavinir fá einnig skýrar tilkynningar um væntanlegar endurnýjanir korta og staðfestingar á pöntunum og breytingum, sem eykur gagnsæi og styrkir svikavarnir.

Á árinu kynntum við einnig yfirsýn greiðsluþjónustu og nýjar sparnaðarleiðir í viðbótarlífeyrissparnaði og við sjáum að viðskiptavinir nýta sér þessa möguleika mikið.

Öflug stafræn þróun bankans hefur leitt til þess að aðgerðir sem áður gátu tekið drjúgan tíma og kallað á aðkomu starfsfólks er nú hægt að framkvæma tafarlaust í sjálfsafgreiðslu. Þetta á t.a.m. við um umsóknir um íbúðalán en á árinu 2025 voru um 85% umsókna afgreiddar með stafrænum hætti.

Í appinu og í netbankanum eiga einstaklingar og fjölskyldur auðvelt með að fá yfirsýn yfir fjármálin. Það býður upp á þægilegan aðgang að öllum gögnum sem lúta að fjármálum sem einfaldar lífið. Auðveldur aðgangur að gögnum og góð yfirsýn hjálpar líka til þegar fólk kemur til okkar í fjármálaráðgjöf.

Ánægja viðskiptavina með fjármálaráðgjöf hefur aukist sem bendir til þess að sameining tækninýjunga og persónulegrar nálgunar sé að skila árangri. Þannig stuðlar stöðug framför í þjónustu bankans að því að einfalda lífið og auka ánægju viðskiptavina.

Sífellt betra spjallmenni

Ellí, spjallmenni bankans, hefur haldið áfram að vaxa og dafna. Á árinu 2025 var henni bætt í appið og sýnileiki hennar aukinn, auk þess sem hún var einnig innleidd í netbanka fyrirtækja. Undir lok árs skyldi Ellí 95,6% spurninga en hlutfallið var 92,6% í upphafi ársins. Viðskiptavinir eru enda ánægðir með þjónustu Ellíar og í þeim tilvikum þar sem viðskiptavinir gefa einkunn eftir spjall fær hún þumalinn upp í 81% tilvika.

Ellí var tilnefnd til verðlauna gervigreindarfulltrúar fyrirtækja á Boost Camp Awards sem veitt voru í Osló í júni. Á ört vaxandi vettvangi þar sem þróunin er gífurlega hröð og samkeppnin hörð var mikill heiður að hljóta tilnefningu fyrir besta viðmótið.

Einfaldara dánarbúsmál með rafrænni upplýsingamiðlun

Á árinu hóf Landsbankinn, fyrstur banka á Íslandi, rafræna miðlun upplýsinga um eignir og skuldir látinna beint til dánarbúskerfis sýslumanna. Með þessu nýja ferli eru bankaupplýsingar skráðar sjálfvirkt í rafrænar umsóknir og skýrslur erfingja, þ. á m. beiðnir um leyfi til einkaskipta, umsóknir um setu í óskiptu búi og erfðafjárskýrslur. Þetta dregur úr handavinnu, eykur öryggi og flýtir fyrir afgreiðslu mála á þessum viðkvæma tíma.

Rafræn dánarbúsþjónusta hefur verið í þróun hjá sýslumönnum frá árinu 2021. Með þátttöku bankans verður ferlið heildstæðara, áreiðanlegra og mun einfaldara fyrir erfingja.

Öruggari netgreiðslur

Í lok ársins buðum við korthöfum Landsbankans að tengja greiðslukortin sín við Click to Pay sem er ný og örugg greiðslulausn fyrir netverslanir. Lausnin er hluti af alþjóðlegri þróun á stafrænum greiðslum og byggir á samstarfi helstu kortasamsteypa.

Click to Pay

Með Click to Pay geta viðskiptavinir greitt á netinu án þess að slá inn kortaupplýsingar, þar sem greiðslur eru staðfestar með auðkenningu og kortaupplýsingar verndaðar með tókatækni.

Innleiðing lausnarinnar stuðlar að auknu öryggi, einfaldara greiðsluferli og samræmdri upplifun í netviðskiptum, óháð kortategund, útgefanda eða tæknibúnaði. Með þessu styrkir bankinn stöðu sína á sviði öruggra stafrænnar greiðslulausna.

Öruggari og betri netbanki fyrirtækja

Nýr netbanki fyrirtækja fór í loftið í byrjun árs með umfangsmiklum breytingum á öllum helstu greiðslu- og innskráningarleiðum. Teknar voru upp þrjár nýjar staðfestingarleiðir við innskráningu sem uppfylla kröfur um sterka auðkenningu og rekjanleika greiðslna. Eftir breytingu er nú hægt að notast við rafræn skilríki, Auðkennisappið eða lífkenni til innskráningar og staðfestingar á greiðslum í Landsbankaappinu. Samhliða þessu var notkun RSA-öryggislykla aflögð.

Dreifileiðir bankans, bæði tæknilegt umhverfi og viðmót fengu samræmt útlit. Þá var samþætting á milli aðgerða í netbanka og appi bætt sem auðveldar notendum að flakka á milli lausna og nýta þá sem hentar best hverju sinni. 

Í nýjum netbanka fyrirtækja er einnig að finna nýtt vinnuborð, sameiginlegt vinnusvæði fyrirtækis sem einfaldar yfirsýn yfir væntanlegt útflæði. Notendur innan sama fyrirtækis geta unnið saman á svæðinu og týnt til þær greiðslur sem á að framkvæma á ákveðnu tímabili. Þá er nú hægt að samþykkja og framkvæma eina eða fleiri greiðslur í einni og sömu aðgerðinni.